विज बिलातील सवलतींचे आश्वासन न पाळल्यास यंत्रमागधारकांचा संताप: विनय महाजन यांचा इशारा
राज्यातील यंत्रमागधारकांना विज बिलामध्ये सवलतींचे आश्वासन देऊन देखील अद्याप याची अंमलबजावणी न झाल्यामुळे यंत्रमागधारकांमध्ये प्रचंड असंतोष वाढला आहे. विज बिलातील अतिरिक्त सवलती १५ मार्चपासून लागू कराव्यात, असे वचन अनेक लोकप्रतिनिधींनी दिले होते. मात्र, या आश्वासनांची पूर्तता अद्यापही झालेली नाही, अशी तक्रार यंत्रमागधारकांकडून केली जात आहे.
या विषयावर भाष्य करताना यंत्रमागधारक संघटनेचे प्रमुख विनय महाजन यांनी राज्यातील लोकप्रतिनिधींना कडक इशारा दिला आहे. “लोकप्रतिनिधींनी दिलेली आश्वासने १५ मार्चपासून लागू झाली पाहिजेत, अन्यथा मागील फरक चालू महिन्याच्या बिलामधून कमी होऊनच दाखल झाले पाहिजेत,” असे त्यांनी ठामपणे सांगितले. जर या आश्वासनांची अंमलबजावणी लवकरात लवकर झाली नाही, तर येणाऱ्या निवडणुकीत यंत्रमागधारक लोकप्रतिनिधींना मत मागायला सुद्धा येऊ देणार नाहीत, असा इशारा महाजन यांनी दिला आहे.
विनय महाजन पुढे म्हणाले की, “खोटी आश्वासने देणाऱ्या लोकप्रतिनिधींना हद्दपार करणे हे यंत्रमागधारकांच्या हिताचे आहे. आमचे उद्योग व व्यवसाय वीज बिलांवर अवलंबून आहेत, आणि याबाबत सरकारच्या कोणत्याही दुर्लक्षामुळे आम्हाला मोठा आर्थिक फटका सहन करावा लागत आहे.”
या विषयावर यंत्रमागधारकांकडून निषेधाचे आवाज उठवले जात आहेत. लोकप्रतिनिधींनी त्वरित कारवाई करून यंत्रमागधारकांच्या मागण्या पूर्ण कराव्यात अशी सर्वांची मागणी आहे.
