सातारा जिल्ह्यात श्री संतश्रेष्ठ ज्ञानेश्वर महाराज पालखी सोहळ्याचा पाच दिवस वैष्णवांचा मेळा

पायी आषाढी वारीसाठी संत ज्ञानेश्वर महाराज पालखी सोहळा परंपरेने ज्येष्ठ वद्य अष्टमीला (शनिवार, दि. २९ जून) आळंदीतून पंढरपूरकडे प्रस्थान करणार आहे. सोहळा (monday)मंगळवार, दि. १६ जुलैला पंढरीत पोचणार असून, मुख्य आषाढी एकादशी बुधवार, दि. १७ जुलैला आहे. दरम्यान, सोहळ्यात तीन उभे रिंगण, चार गोल रिंगणे होणार आहेत. पालखी मार्गावर पालखी सोहळा सातारा जिल्ह्यात लोणंदमध्ये अडीच दिवस, तरडगाव एक दिवस, फलटणमध्ये एक दिवस, बरड एक दिवस तसेच पुणे जिल्ह्यातील पुणे शहर आणि सासवड येथे प्रत्येकी दोन दिवसांच्या मुक्कामी राहील. ३२ दिवसांचा प्रवास करून पालखी सोहळा पुन्हा ३१ जुलैला आळंदीत परतणार आहे, अशी माहिती श्री ज्ञानेश्वर महाराज आळंदी देवस्थानचे विश्वस्त आणि पालखी सोहळाप्रमुख योगी निरंजननाथ यांनी दिली.

यावेळी प्रमुख विश्वस्त ॲड. राजेंद्र उमाप, पालखी सोहळामालक बाळासाहेब आरफळकर, विश्वस्त डॉ. भावार्थ देखणे आदी उपस्थित होते. पालखी सोहळाप्रमुख योगी निरंजनाथ म्हणाले की, संत ज्ञानेश्वर माउलींचा पालखी सोहळा आळंदीतून २९ जूनला देऊळवाड्यातून सायंकाळी चारनंतर प्रस्थान ठेवेल. पहिला मुक्काम आळंदीतच नवीन दर्शन मंडपात राहील.

संतश्रेष्ठ श्री ज्ञानेश्वर महाराज आषाढी वारी पालखी सोहळा संस्थेने जाहीर केलेल्या वेळापत्रकानुसार शनिवार, दि. सहा जुलै रोजी पालखी सोहळा नीरा स्नान व आरती होईल. त्यानंतर सातारा जिल्ह्यात ज्ञानेश्वर महाराज पालखी सोहळ्याचे आगमन होईल. पाडेगाव येथे सातारा जिल्ह्याच्या वतीने स्वागत केल्यानंतर रात्री लोणंद येथे हा सोहळा मुक्कामी राहील. दुसऱ्या दिवशी रविवार, दि. सात जुलै रोजी पालखी लोणंद येथेच मुक्कामी असणार आहे.

लोणंद येथील अडीच दिवसाच्या मुक्कामानंतर सोमवार, दि. आठ जुलै रोजी पालखी सोहळा तरडगाव (ता. फलटण) येथे मुक्कामाला प्रस्थान करेल. दुपारी चारच्यादरम्यान दिवशी चांदोबाचा लिंब येथे पहिले उभे रिंगण होईल. त्यानंतर तरडगाव येथे ज्ञानेश्वर पालखीचा मुक्काम राहील.

मंगळवार, दि. नऊ जुलै रोजी पहाटे पाच वाजता फलटणकडे प्रस्थान करेल. दत्त मंदिर काळज, सुरवडी, निंभोरे ओढा, वडजल येथे विसाव्यासाठी पालखी दर्शनासाठी काही वेळ थांबेल. त्यानंतर सायंकाळी सोहळा पालखी फलटण विमानतळावर मुक्कामी असेल.

बुधवार, दि. १० जुलै रोजी पालखी सोहळा बरडला प्रस्थान करेल. या मार्गावर विडणी, पिंपरद, निंबळक फाटा येथे विसावा घेतल्यानंतर तो बरडकडे मुक्कामासाठी मार्गस्थ होईल.

गुरुवार दि. ११ जुलै रोजी बरड मुक्कामानंतर पालखी सोहळा सोलापूर जिल्ह्याकडे प्रस्थान करेल. साधूबुवाचा ओढा येथे सकाळचा विसावा झाल्यानंतर बरडच्या सीमेवर धर्मपुरीजवळ पालखी सोहळ्याचे सोलापूर जिल्ह्याच्या वतीने स्वागत केल्यानंतर पालखी सोहळ्याचा धर्मपुरी कॅनॉल कारुंडेकडे प्रस्थान करेल.

संतश्रेष्ठ श्री ज्ञानेश्वर महाराज आषाढी पायी वारी पालखी सोहळ्याचे देवाचे आळंदी येथील संस्थांच्या वतीने वेळापत्रक जाहीर करण्यात आले असल्याने दिंडी चालक-मालक यांची तयारी सुरू असल्याचे दिसत. माउलींचा पालखी सोहळा यावर्षी मोठा होणार असल्याने भाविक वारकऱ्यांची मोठी गर्दी पाहायला मिळणार आहे.

सातारा जिल्ह्यात नीरा स्नानानंतर पालखीचे आगमन होते, तर बरडच्या सीमेवर धर्मपुरीजवळ पालखी सोहळा सोलापूर जिल्ह्यात प्रवेश करतो. या आषाढी पायी वारी सोहळ्याने भाविकांसाठी एक नवचैतन्य निर्माण होते. अनेक वारकरी या सोहळ्यात सामील होण्यासाठी तयारी करू लागले आहेत. दिंडी चालक- मालकांना आरोग्यविषयी सर्व सूचना देण्यात आल्या आहेत, असे योगी निरंजननाथ यांनी सांगितले.
पंढरपूर येथील गोपाळकाल्याच्या कार्यक्रम होऊन पालखीचा रविवार, दि. २१ जुलै रोजी पुन्हा परतीचा प्रवास सुरू होणार आहे. सातारा जिल्ह्यात परतीच्या प्रवासात बुधवार, दि. २४ जुलैला फलटण, तर पाडेगाव येथे गुरुवार, दि. २५ जुलै पालखीचा मुक्काम राहणार आहे.

असा असेल सातारा जिल्ह्यात श्री ज्ञानेश्वर महाराज पालखी सोहळ्याचा मुक्काम

शनिवार, दि. सहा जुलै रोजी पालखी सोहळा नीरा स्नान. त्यानंतर सातारा जिल्ह्यात प्रवेश करेल. रात्री लोणंद येथे सोहळा मुक्काम
रविवार, दि. सात जुलै रोजी पालखी लोणंद येथे मुक्काम
सोमवार, दि. आठ जुलै रोजी पालखी सोहळा तरडगाव येथे मुक्काम. या दिवशी चांदोबाचा लिंब येथे पहिले उभे रिंगण.
मंगळवार, दि. नऊ जुलै रोजी फलटण येथे पालखी सोहळा मुक्काम. यादरम्यान सुरवडी, निंभोरे, वडजल येथे काही वेळ विसाव्यासाठी पालखी थांबा
बुधवार, दि. १० जुलै रोजी पालखी सोहळा बरड मुक्कामी. दुसऱ्या दिवशी ११ जुलै रोजी सोलापूर जिल्ह्यात पालखी सोहळ्याचा प्रवेश होईल.

हेही वाचा :

सोन्याच्या तस्करीप्रकरणी दोन परदेशी महिलांना अटक.

लग्नाच्या पाच वर्षांनी आणखी एका प्रसिद्ध दाक्षिणात्य अभिनेत्याचा संसार मोडला.

भुजबळांचे हे फोटो तुम्ही कधीच पाहिले नसतील ब्लेझर, चष्मा अन् दाढी..

सांगली: चार शतकांचा असणारा वटवृक्ष कोसळला