महाराष्ट्रात भोंदूगिरी आणि अघोरी प्रथांच्या नावाखाली सुरू असलेल्या गुन्हेगारी (hypocrisy) कारवायांनी पुन्हा एकदा समाजाला हादरवून सोडले आहे. चंद्रपूर जिल्ह्यात उघडकीस आलेल्या अघोरी पूजेच्या प्रकरणामुळे राज्यभरात संतापाची लाट उसळली असून, महिलांच्या सुरक्षिततेबाबत गंभीर प्रश्न निर्माण झाले आहेत.
सावली तालुक्यातील चिंचडोह बॅरेज परिसरात वनविभागाने कासव तस्करीवर कारवाई करत सहा आरोपींना अटक केली. या कारवाईदरम्यान तपास अधिकाऱ्यांच्या हाती लागलेल्या मोबाईलमधून अत्यंत धक्कादायक माहिती समोर आली. आरोपी केवळ वन्यजीव तस्करीतच गुंतलेले नव्हते, तर अघोरी पूजेच्या नावाखाली महिलांचे शोषण करणाऱ्या मोठ्या रॅकेटचा भाग असल्याचे उघड झाले.
मोबाईलमधील व्हिडिओ आणि चॅट्समध्ये स्मशानभूमीत मध्यरात्री केले जाणारे अघोरी विधी, घुबड आणि कासवांचा वापर, तसेच अनेक तरुण मुली आणि विधवा महिलांचे फोटो आढळले. काही प्रकरणांमध्ये महिलांची वैयक्तिक आणि अतिशय संवेदनशील माहितीही नोंदवून ठेवण्यात आली होती. या सर्व बाबी पाहता, हा प्रकार केवळ अंधश्रद्धेपुरता मर्यादित नसून संगनमताने चालवलेले शोषणाचे जाळे असल्याचे स्पष्ट होत आहे.
तपासात असेही समोर आले की, गुप्तधन मिळवून देण्याचे आमिष दाखवून महिलांना या विधींमध्ये ओढले जात होते. आरोपींनी अघोरी पूजेमुळे सोन्याची बिस्किटे मिळाल्याचा बनाव रचला होता, मात्र ती बनावट असल्याचे निष्पन्न झाले आहे. या माध्यमातून लोकांची आर्थिक फसवणूकही केली जात होती.
या प्रकरणातील मुख्य सूत्रधार असलेला मांत्रिक अद्याप फरार असून, त्याचा शोध सुरू आहे. दरम्यान, या रॅकेटचे जाळे चंद्रपूरसह गडचिरोली जिल्ह्यातील ग्रामीण भागात पसरले असल्याची माहिती समोर आली आहे. या टोळीत अनेक मध्यस्थ कार्यरत होते, जे महिलांना ‘शिकार’ म्हणून शोधून त्यांची माहिती मुख्य मांत्रिकापर्यंत पोहोचवत होते.
वनविभागाच्या अधिकाऱ्यांनी या प्रकरणाची गंभीर दखल घेतली असून, पुढील तपास पोलिसांकडे वर्ग करण्याची प्रक्रिया सुरू आहे. आतापर्यंत काही जणांना ताब्यात घेण्यात आले असून, या प्रकरणात आणखी धक्कादायक खुलासे होण्याची शक्यता वर्तवली जात आहे.
या घटनेमुळे अंधश्रद्धा, भोंदूगिरी आणि त्यातून होणाऱ्या गुन्ह्यांविरोधात कठोर कारवाईची मागणी पुन्हा एकदा जोर धरू लागली आहे. समाजातील असुरक्षित घटकांना लक्ष्य करून त्यांचे शोषण करणाऱ्या अशा प्रवृत्तींवर आळा घालणे ही यंत्रणेसमोरची मोठी जबाबदारी ठरत आहे.
हेही वाचा
धक्कादायक! तक्रारदार महिलेकडे शरीरसुखाची मागणी, पोलिसाच्या कृत्याने संताप
मोठी बातमी! महाराष्ट्रात पुन्हा धुरळा उडणार, विधान परिषदेच्या १७ जागांची लवकरच निवडणूक
करदात्यांसाठी महत्त्वाची बातमी! आयटीआर फॉर्म भरण्याच्या नियमात मोठे बदल