अमेरिका आणि इराण यांच्यात सुरू असलेल्या तणावपूर्ण संघर्षाला (implemented) अखेर तात्पुरता विराम मिळाला असून पाकिस्तानच्या मध्यस्थीने युद्धविराम लागू करण्यात आला आहे. या घडामोडीनंतर जागतिक स्तरावर दिलासा व्यक्त केला जात असतानाच एक महत्त्वाची राजनैतिक हालचाल समोर आली आहे. इराणच्या संसद अध्यक्ष मोहम्मद बाकेर कलीबाफ यांच्या नेतृत्वाखालील उच्चस्तरीय प्रतिनिधिमंडळ इस्लामाबादमध्ये दाखल झाले असून अमेरिकेशी थेट चर्चा करण्याची तयारी सुरू झाली आहे. हा दौरा संघर्ष संपवण्याच्या दिशेने महत्त्वाचे पाऊल मानला जात आहे.
इराणी माध्यमांच्या माहितीनुसार, या प्रतिनिधिमंडळात परराष्ट्र मंत्री अब्बास अराघची, सर्वोच्च राष्ट्रीय सुरक्षा परिषदेचे सचिव अली अकबर अहमदीन, केंद्रीय बँकेचे गव्हर्नर अब्दोलनासेर हेम्मती आणि माजी आयआरजीसी कमांडर मोहम्मद बाकेर जोलघाद्र यांसह अनेक वरिष्ठ अधिकारी सहभागी आहेत. या भेटीत प्रादेशिक सुरक्षा, आर्थिक निर्बंध आणि जप्त मालमत्तेच्या मुद्द्यांवर सखोल चर्चा होण्याची शक्यता आहे.
इस्लामाबादमध्ये दोन्ही देशांच्या प्रतिनिधींमध्ये आमने-सामने चर्चा होणार असली तरी परिस्थिती अत्यंत नाजूक असल्याचे स्पष्ट झाले आहे. दोन्ही बाजूंमध्ये अविश्वास कायम असून युद्धविरामाचे उल्लंघन केल्याचे आरोपही परस्परांवर केले जात आहेत. इराणने स्पष्ट केले आहे की, कोणतीही औपचारिक चर्चा सुरू होण्यापूर्वी अमेरिकेने काही ठोस पावले उचलणे आवश्यक आहे.
दरम्यान, अमेरिकेचे उपराष्ट्रपती जेडी व्हान्स यांच्या नेतृत्वाखालील प्रतिनिधिमंडळही इस्लामाबादकडे रवाना झाले आहे. या टीममध्ये विशेष दूत स्टीव विटकॉफ आणि जेरेड कुशनर यांचा समावेश आहे. व्हाइट हाउसकडून या चर्चेबाबत सावध भूमिका घेतली जात असून होर्मुज सामुद्रधुनी तात्काळ खुली होण्याची शक्यता कमी असल्याचे संकेत देण्यात आले आहेत.
इराणने आपल्या अटींमध्ये लेबनॉनमधील हिजबुल्लाहवर झालेल्या कारवाईचा समावेश करण्याची आणि निर्बंधांमुळे गोठवलेली मालमत्ता मुक्त करण्याची मागणी केली आहे. या मागण्यांवर अमेरिका कितपत सकारात्मक भूमिका घेते, यावर पुढील चर्चेचे भवितव्य अवलंबून असेल.
याआधी ओमानच्या मध्यस्थीने झालेल्या चर्चांनंतरही तणाव वाढला होता आणि हल्ल्यांमध्ये इराणचे सर्वोच्च नेते आयातुल्ला अली खामेनेई यांच्यासह अनेक वरिष्ठ अधिकारी मृत्युमुखी पडल्याचा दावा करण्यात आला होता. त्यामुळे दोन्ही देशांमध्ये अविश्वास अधिकच वाढला आहे. आता इस्लामाबादमधील ही बैठक या तणावपूर्ण परिस्थितीत शांततेकडे वाटचाल घडवून आणते का, याकडे संपूर्ण जगाचे लक्ष लागले आहे.
हेही वाचा
SBI ग्राहकांनो लक्ष द्या! उद्या ‘या’ वेळेत तात्पुरत्या सेवा बंद राहणार
सांगलीत भोंदूबाबाची एन्ट्री; स्मशानभूमीत आढळली काळी बाहुली अन् सुया, नागरिकांमध्ये दहशत
GPayचं हटके फीचर! आता बँक अकाउंटशिवाय करा UPI पेमेंट; पॉकेट मनी आहे तरी काय?