संपूर्ण राज्यात चर्चेत असलेल्या भोंदू बाबा अशोक खरात प्रकरणाला नवं वळण (shocking incident) देणारी धक्कादायक घटना आज समोर आली. खरात यांचा अत्यंत जवळचा सहकारी आणि शिवानिका ट्रस्टचे संचालक व उपाध्यक्ष जितेंद्र शेळके यांचा भीषण अपघातात मृत्यू झाला. हा अपघात छत्रपती संभाजीनगर ते शिर्डी मार्गावरील धोत्रे गावाजवळ दुपारी साडेबारा वाजण्याच्या सुमारास घडला. या दुर्घटनेत शेळके यांच्यासह त्यांच्या पत्नीचाही मृत्यू झाला असून त्यांचा मुलगा गंभीर जखमी झाला आहे. त्याला तातडीने रुग्णालयात दाखल करण्यात आले आहे.
या अपघातानंतर राज्यभरात संशयाचे वातावरण निर्माण झाले आहे. कारण, हा केवळ अपघात नसून घातपात असू शकतो, अशी शक्यता काही सामाजिक कार्यकर्त्यांनी व्यक्त केली आहे. सामाजिक कार्यकर्त्या तृप्ती देसाई यांनी या घटनेवर प्रतिक्रिया देताना म्हटले की, शेळके यांचा मृत्यू अत्यंत संशयास्पद आहे. खरात प्रकरणात ते महत्त्वाचे पदाधिकारी होते आणि साक्षीदारांपैकी एक असण्याची शक्यता नाकारता येत नाही. त्यामुळे साक्षीदारांना संपवण्याचा कट रचला जात असल्याचा गंभीर आरोप त्यांनी केला आहे. पोलिसांनी तातडीने सर्व साक्षीदारांना संरक्षण द्यावे, अशी मागणीही त्यांनी केली.
याचप्रमाणे सामाजिक कार्यकर्त्या अंजली दमानिया यांनीही या अपघातावर अनेक प्रश्न उपस्थित केले आहेत. कंटेनरला गाडी धडकली की कंटेनरच मागे येऊन धडकला, याचा तपास होणे गरजेचे असल्याचे त्यांनी सांगितले. अपघातानंतर कंटेनरचा चालक आणि क्लिनर घटनास्थळावरून गायब झाल्यामुळे संशय अधिकच गडद झाला आहे. शिवानिका ट्रस्टमधील व्यवहार आणि सुरू असलेल्या चौकशीच्या पार्श्वभूमीवर हा अपघात घडल्याने अनेक शंका उपस्थित होत आहेत.
दरम्यान, धोत्रे गावचे सरपंच प्रदीप चव्हाण यांनी दिलेल्या माहितीनुसार, अपघाताची माहिती मिळताच गावकऱ्यांनी घटनास्थळी धाव घेतली. गाडी कंटेनरमध्ये मागून घुसल्याची स्थिती होती. जखमी मुलाला बाहेर काढून रुग्णालयात पाठवण्यात आले. मात्र, गाडीमध्ये अडकलेल्या महिलेपर्यंत पोहोचण्यास उशीर झाल्याने तिचा मृत्यू झाला. क्रेन वेळेवर न आल्यामुळे बचावकार्य उशिरा पार पडल्याचेही त्यांनी सांगितले.
या घटनेनंतर खरात प्रकरणातील तपास अधिकच संवेदनशील बनला असून, अपघातामागील खरे कारण काय, हा प्रश्न आता सर्वांसमोर उभा राहिला आहे. पोलिसांनी या प्रकरणाची सखोल चौकशी करून सत्य बाहेर आणण्याची गरज व्यक्त केली जात आहे.
हेही वाचा
आता 100 रुपयांच्या मालावरही द्यावा लागणार टॅक्स
जास्त पगार असूनही बँक कर्ज देत नाहीये? तर ‘या’ ४ गोष्टींकडे लक्ष द्या
MSRTC कडून एसटी बस दरात मोठी वाढ! प्रत्येक तिकिटावर अतिरिक्त चार्जही लागू