आजकाल बहुतांश लोक अँड्रॉइड स्मार्टफोन वापरतात. मात्र अनेक वेळा (Android) फोनची मेमरी भरली की फोन स्लो होणे, हँग होणे किंवा अॅप्स उघडायला जास्त वेळ लागणे अशा समस्या सुरू होतात. अनेकांना वाटते की केवळ स्टोरेज फुल झाल्यामुळेच ही अडचण निर्माण होते. प्रत्यक्षात मात्र अँड्रॉइड फोनमध्ये सतत चालू असलेली बॅकग्राउंड अॅप्स आणि काही सेटिंग्जही फोनच्या परफॉर्मन्सवर मोठा परिणाम करतात.
अँड्रॉइड फोनमध्ये ‘डेव्हलपर ऑप्शन्स’ हा एक खास पर्याय असतो. नावावरून तो फक्त डेव्हलपर्ससाठीच असल्यासारखा वाटतो, पण प्रत्यक्षात या सेक्शनमधील अनेक सेटिंग्ज सामान्य वापरकर्त्यांसाठीही खूप उपयुक्त ठरू शकतात. या सेटिंग्ज योग्य पद्धतीने बदलल्यास फोन अधिक सुरळीत चालू शकतो आणि स्लो होण्याची समस्या मोठ्या प्रमाणात कमी होते.
अँड्रॉइडवर मल्टीटास्किंगमुळे (Android) अनेक कामे एकाच वेळी करता येतात, पण त्याचा थेट ताण फोनच्या प्रोसेसर आणि बॅटरीवर पडतो. डेव्हलपर ऑप्शन्समधील बॅकग्राउंड प्रोसेस लिमिट कमी केल्यास एकाच वेळी चालणाऱ्या अॅप्सची संख्या मर्यादित राहते. यामुळे फोनची रॅम कमी वापरली जाते आणि परफॉर्मन्स सुधारतो.
याशिवाय, अँड्रॉइड फोन प्रत्येक अॅक्टिव्हिटीची नोंद ठेवतो. हे फीचर डेव्हलपर्ससाठी उपयुक्त असले तरी सामान्य वापरकर्त्यांसाठी फारसे आवश्यक नसते. डिफॉल्टनुसार लॉगर बफरचा आकार मोठा असल्यामुळे फोनची मेमरी आणि CPU वर अतिरिक्त भार पडतो. हा बफर आकार कमी केल्यास किंवा पूर्णपणे बंद केल्यास फोनवरील ताण कमी होतो आणि कार्यक्षमता वाढते.
ज्यांना बॅटरीपेक्षा स्मूथ अनुभव महत्त्वाचा वाटतो, त्यांच्यासाठी फोर्स पीक रिफ्रेश रेट (Android) हा पर्याय उपयोगी ठरतो. अनेक वेळा बॅटरी वाचवण्यासाठी अँड्रॉइड आपोआप रिफ्रेश रेट कमी करतो. हा पर्याय सक्षम केल्यास फोन कायम उच्च रिफ्रेश रेटवर चालतो आणि सोशल मीडिया स्क्रोलिंग किंवा गेमिंगचा अनुभव अधिक आनंददायी होतो.
फोनमधील अॅनिमेशनदेखील परफॉर्मन्सवर परिणाम करतात. अॅप उघडताना होणारी ट्रान्झिशन, मेनू पॉप-अप किंवा स्क्रीन बदलताना दिसणारे इफेक्ट्स हे हाय-एंड फोनवर छान दिसतात, पण मध्यम किंवा एंट्री-लेव्हल फोनवर ते फोन स्लो करू शकतात. डेव्हलपर ऑप्शन्समधून ही अॅनिमेशन कमी किंवा बंद केल्यास फोन अधिक वेगाने प्रतिसाद देतो.
थोडक्यात, अँड्रॉइड फोन स्लो होण्यामागे केवळ मेमरीच कारणीभूत नसते. डेव्हलपर ऑप्शन्समधील काही सोप्या सेटिंग्ज बदलल्यास फोनचा वेग, बॅटरी आणि एकूणच वापराचा अनुभव लक्षणीयरीत्या सुधारू शकतो.
हेही वाचा :
खुशखबर! आयकर विभागात नोकरीची संधी; पगार ८१,८०० रुपये; अर्ज कसा करावा?
सेमीफायनलमध्ये अफगाण शतकी जोडीचा धडाका! भारतासमोर 311 धावांचे तगडे लक्ष्य, फायनलची लढत रंगणार