मुंबईसह संपूर्ण राज्यातील लोक सण आणि उत्सवाच्या मूडमध्ये आहेत. सगळीकडे गणरायाच्या आगमनाची तयारी जवळपास सुरु झाली आहे. अनेक मंडळांमध्ये बाप्पा विराजमान झाला आहे. दरम्यान, बेस्टच्या वीज विभागाने गणेशोत्सव मंडळांना आणि निवासी गणेशोत्सवांना काही अटी आणि शर्तींसह सवलतीच्या दरात वीजपुरवठा करण्याचा निर्णय घेतला आहे.
गणेशोत्सवासाठी तात्पुरत्या वीजपुरवठ्यासाठी अर्ज स्वीकारण्यासाठी प्रत्येक ग्राहक सेवा विभागात सुविधा कक्षांची स्थापना करण्यात आली आहे. ज्या गणेश मंडळांना त्यांची मागणी ऑनलाइन नोंदवायची आहे, त्यांनी वेबसाइटला भेट देऊन अर्ज नोंदणी करावी लागेल. अर्जाची प्रिंटआउट संबंधित ग्राहक सेवा विभागाकडे सादर करावी लागेल. त्यानंतर, बेस्टचा वीज विभाग संबंधित गणेशोत्सव मंडळांना सवलतीच्या दरात वीजपुरवठा करेल.