राज्यातील स्थानिक स्वराज्य संस्थांच्या निवडणुकीच्या पार्श्वभूमीवर राजकीय पक्षांतरांचा हंगाम उग्र झाला आहे. या अनुषंगाने राष्ट्रवादी काँग्रेस पक्षात आज मोठी राजकीय(political) हालचाल पाहायला मिळाली. शरद पवारांचे निष्ठावंत सहकारी, माजी विधानसभा अध्यक्ष आणि ज्येष्ठ नेते अरुण गुजराती यांनी अखेर अजित पवार यांच्या नेतृत्वाखाली राष्ट्रवादी काँग्रेसमध्ये प्रवेश करण्याचा निर्णय घेतला आहे. मंगळवारी संध्याकाळी महिला आर्थिक विकास महामंडळाच्या कार्यालयात अरुण गुजराती अधिकृतपणे अजित पवार यांच्या उपस्थितीत पक्षात प्रवेश करणार आहेत.
अरुण गुजराती हे शरद पवारांचे चार दशकांपासूनचे निष्ठावंत सहकारी मानले जातात. त्यांनी काँग्रेस पक्षातून शरद पवारांसोबत राजकारणाची सुरुवात केली, नंतर राष्ट्रवादी काँग्रेस स्थापनेपासून ते पक्षाशी घट्ट नाते जोडलं. गुजराती यांनी मंत्री, विधानसभेचे अध्यक्ष, प्रदेशाध्यक्ष अशा विविध पदांवर काम केलं असून, चोपडा विधानसभा मतदारसंघातून दोन कार्यकाळ राष्ट्रवादी काँग्रेसचे आमदार म्हणूनही त्यांनी सेवा बजावली आहे.
आज सकाळी मुंबईतील वाय. बी. चव्हाण सेंटर येथे शरद पवारांची भेट घेताना अरुण गुजराती यांनी भावनिक प्रतिक्रिया व्यक्त केली. त्यांनी सांगितले, “शरद पवार साहेबांसोबत आनंदाचा काळ गेला. ज्यांनी मला मोठं केलं ते शरद पवार आणि ज्यांनी मला पुढे आणलं ते माझे कार्यकर्ते. दोघांच्या मध्ये मी सँडविच झालो होतो. मात्र कार्यकर्त्यांच्या आग्रहास्तव मी अजित पवार यांच्यासोबत जाण्याचा निर्णय घेतला.”
राष्ट्रवादी काँग्रेस पक्ष दोन गटांत विभागल्यानंतर चोपडा परिसरात अरुण गुजराती यांच्या समर्थकांमध्ये मोठी फूट पडली होती. काही कार्यकर्ते भाजपात(political) गेले, तर काही इतर पक्षात प्रवेश केला. त्यानंतर कार्यकर्त्यांच्या दबावाखाली अरुण गुजराती यांना अखेर निर्णय घ्यावा लागला.
चोपडा परिसरातील संघटनात्मक पकड लक्षात घेता, गुजराती यांच्या प्रवेशामुळे अजित पवार गटाला स्थानिक स्तरावर मोठा बळकटी मिळणार आहे. राज्यात नगरपरिषद व नगरपंचायतींच्या निवडणुकीचा कार्यक्रम जाहीर झाल्यामुळे या घडामोडींना अधिक राजकीय महत्त्व प्राप्त झाले आहे. अजित पवार गटासाठी हा प्रवेश “प्रतिष्ठेचा” मानला जात आहे.
हेही वाचा :
इचलकरंजी महानगरपालिका निवडणुकीची आरक्षण सोडत जाहीर
उच्च न्यायालयाजवळ कार स्फोटात 12 जणांचा मृत्यू…
क्रिकेटर शुभमन गिलची नातेवाईक आहे शहनाज? कनेक्शनवर सोडलं मौन