अहिल्यानगर जिल्ह्यातील पारनेर तालुक्यात एका कीर्तनकार आणि वारकरी शिक्षण संस्थेच्या अध्यक्षावर अल्पवयीन मुलीवर पाच वर्षांपासून शारीरिक अत्याचार केल्याचा गंभीर आरोप समोर आला आहे.
ढवळपुरी येथील श्री दुर्गादेवी वारकरी शिक्षण संस्थेचे अध्यक्ष यशवंत एकनाथ थोरात उर्फ अण्णासाहेब गुंजाळ महाराज यांच्यावर १७ वर्षीय मुलीवर वारंवार बलात्कार केल्याचा आणि तिला धमक्या देऊन मौन बाळगायला भाग पाडल्याचा आरोप करण्यात आला आहे. (Parner) पीडित मुलीच्या भावाने दिलेल्या फिर्यादीवरून आरोपीविरुद्ध पोस्को कायद्यासह अत्याचाराचा गुन्हा दाखल करण्यात आला असून, पारनेर पोलिसांनी रविवारी पहाटे त्याला अटक केली. न्यायालयाने आरोपीला २० मार्चपर्यंत पोलीस कोठडी सुनावली आहे.
पीडित मुलगी ढवळपुरी गावातील इयत्ता आठवीत शिकत होती. आरोपीने तिला धाक दाखवत नववीच्या वर्गात असल्यापासून जबरदस्तीने शरीरसंबंध ठेवल्याचा आरोप आहे. कुणाला सांगितल्यास कुटुंबीयांना जीवे मारण्याची धमकी दिल्याने भीतीपोटी मुलीने पाच वर्षे ही घटना गुप्त ठेवली होती. १० मार्च रोजी गुंजाळ महाराजांनी फोन करून तिला घरी बोलावले. मुलीने नकार दिल्यावर संतापलेल्या आरोपीने तिला मारहाण केली. (Parner) त्यानंतर स्वयंपाकघरातील लोखंडी पक्कड गॅसवर गरम करून तिच्या दोन्ही मांडींवर चटके दिल्याचा धक्कादायक प्रकार समोर आला आहे. धक्कादायक बाब म्हणजे यशवंत थोरात उर्फ गुंजाळ महाराज यांच्यावर यापूर्वीही अशाच स्वरूपाचे दोन गुन्हे दाखल आहेत. त्यापैकी एका प्रकरणात तो निर्दोष मुक्त झाला असून, दुसऱ्या प्रकरणाचा खटला सध्या न्यायालयात सुरू आहे.
या घटनेने ढवळपुरीसह संपूर्ण पारनेर तालुक्यात तीव्र संताप व्यक्त केला जात आहे. एकीकडे धार्मिक कीर्तन आणि प्रवचन करणारा महाराज, दुसरीकडे अल्पवयीन मुलीवर असे क्रूर अत्याचार,(Parner) यामुळे वारकरी संप्रदायाच्या प्रतिमेला मोठा धक्का बसल्याची भावना व्यक्त होत आहे. पीडित मुलीची वैद्यकीय तपासणी केली असून, पोलिस उपनिरीक्षक रणजित मारग यांच्या मार्गदर्शनाखाली पुढील तपास सुरू आहे. पारनेर पोलिसांनी नागरिकांना आवाहन केले आहे की, गुंजाळ महाराजांविरुद्ध आणखी कोणतीही तक्रार किंवा माहिती असल्यास तात्काळ पोलीस स्टेशनशी संपर्क साधावा.
हेही वाचा :
धक्कादायक, लग्नास नकार दिल्याने तरुणीला एचआयव्हीचे इंजेक्शन दिले
भर उन्हाळ्यात कोल्हापुरात अवकाळी पाऊस; गारपीटीमुळे नुकसानाची शक्यता
संपूर्ण जग भीषण इंधन टंचाईत अडकलं, पण भारतानं करून दाखवलं, 7 सर्वात मोठ्या गुड न्यूज